"سچکان"ءَ وانگ ھژدری إنت. چمشانک: ولید گربنی

قصہ چؤ بنا بیت کہ مڈل إیسٹءَ جاہ منندین یکـّے چہ منی سنگتان جُست کت " تو ماھتاک 'سچکان'ءِ نوکین شماره دیستگ؟"
یورپءَ نندگءِ سببا منا أولا بس یک ماھتاکے دستا کپگا أت، آ أت واجہ بندیگءِ 'بلوچی' إیشیا أبید بلوچی لبزانکے ھست أت کہ بند بیتگ أت۔ بلوچی زندءِ نام من إشکتگ أت و بس؛ تاکبند سچکانءِ رنگ تنے وھدی من نہ دیستگ أت۔ سچکان وشین نامے، بلے إے ناما ماھتاکے ھست أت من ھچ سھیگ نہ إتان۔ من وتی سنگتا ھم ھمے گپ گشت۔
آئیا درّائینت " تو وا لندنءَ إیشیءِ جاھگیرئے!"
آئیءِ ڈولا من ھم حیران بیتان۔ من تاکبندےءِ جاھگیران و جاھگیر بیگءِ حال وتی جاھا من ماھتاکءِ نام ھم نہ إشکتگ أت!۔

خیر إے خبر دیمترا شت و یک روچے واجہ راشد بلوچءَ نہ زانان چہ کجا منی نمبر درگپتگ أت و منا ٹلفن ئی جت۔ مئے گپ بیت، یکـّا دگرا گون پجـّاروکی بیت و آئی منا گشت کہ ماھتاک سچکانءِ شونکار ھمائی إنت۔ من چہ آئیا دسبندی کت کہ پہ من یک تاکے راہ بہ دات تا من بہ زانان إے چونین رنگئے إنت۔ آ گپ گوَست و شت تا ھمے نومبر ماھا کہ منی سر کراچیءَ گپت۔ من تچکا لیمارکیٹءَ بلوچی کتاب بھا کنوکین دکانان وتا سر کت و سچکانے زرت۔

ھمے تاکبندءِ چکـّا واجہ راشدءِ ٹلفن نمبر ھست أت۔ آئیا من ٹلفن جت۔ گڈا ھما روچا منی گورا وت ئی سر کت و منا شرفدارئی کت۔ ما نشتین گپ تران بیت۔ واجھا پہ من لھتے تاکبند و کتاب ھم آرتگ أت۔ چدا پیسر چہ واجہ دشتیاریءِ گورا ھم لھتے کتاب منا رستگ أت۔ نین منی گورا پہ وانگا گپڑے کتاب جم بیت۔

واجہ راشد واھگ ظاھر کت کہ من وتی نظران آئیءِ شونکاریا شنگ بیتگین 'سچکان'ءِ باروا بہ نبیسان۔ بزان وتی نظران بہ گشان۔ آ وھدی منا موہ نہ بیت۔ تاکبند من شرّی سرا چارإت نہ کت أنت۔ ألبت لھتے تاک گون وت آرت أنت۔ وتی فرصتا همے تاکان بران برانا من چارگا بیتگان۔

پھکانءِ باروا من ھچ گشت نہ کنان۔ یوکا یک تاکے وتی دیما کنگایان و آئيءِ باروا إے سیاھگا وانوکان چیزے گشگ لوٹان۔ ألبت مردم باید پاچ جان محمد دشتی وتی قدا بہ چاریت۔ منی قد إنچوک نہ إنت کہ یک علمی چمشانکے بہ دیان۔ بس وتی کسانین دیدا چیزے کہ سرپد بیتگان گشان۔

واجہ راشد بلوچءِ آرتگ و منا داتگین تاک من دیما إیر کت أنت، و چؤش إیرانیان پالے جتان۔ بزان چم بند کت أنت و چہ إیشانءِ نیاما یکـّے در کت۔ إیشی نومبر 2006ءِ تاک إنت۔ ھمشی سرا کسانین چمشانکے دیان۔

ھو! نام ئی 'سچکان' إنت۔ سرتاکا واجہ شکراللہءِ رَزتگین ندارگے إنت۔ مردے گون بُنڈین ریشتان تلپچین آسمانءِ چيرا نشتگ و دیم ئي گون بے تاکین درچک و تامورین کوھان إنت کہ روچ زردءِ رنگ إیشانءِ سرا تالان إنت۔ آسمانءَ جمبر ھم کوھانءِ ڈولا سھرچک أنت۔ عکسءِ لمبان سچکانین تگردےءِ ڈولدارین گواپءِ دَرور ديگ بیتگ۔ سرتاکءِ توکی نیمگا تبلیغ أنت۔ پدا تاکے لیٹینگا رند 'سچکان'ءِ نام إنت کہ إے بی سی سرٹیفائڈ إنت۔ شنگ کنوکانءِ لڑ إنت۔ کراچی و گوادرءِ ڈس أنت۔ بھا ئی 25 کلدار إنت۔ یک دگہ تاکے لیئٹنگا رند جھگیرانءِ لڑ إنت۔ آ دگہ تاکا 'نچین' بزان ندکارانءِ لڑ إنت۔

چدا دیمتر إداریہ إنت کہ مبارک قاضیءِ بندیگیءِ سرا إنت۔ وشتین وڑےءَ نبشتہ إنت۔ ألبت لھتے فروف و لھتے لبزانکی ردی ئی مان أنت۔ ھمے جیڑہ ماھتاک بلوچیءَ ھم ھست إنت و إمبری گون واجہ بندیگ إیشیءَ باروا من گپ جتگ أت۔

آ کشتر دعوتءِ رسول۔۔۔ سرحالا إبنءِ حاجی پنچ شنبہءِ شعرے شنگ إنت۔ چہ عربی گالان سرّ ریچین دراجکشین شعرے۔ کوھنین بلوچی شعرانءِ یادا تازہ کنت۔ پدا من وانت "بلوچ و بلوچی" کہ غنی پھوال نبشتہ کتگ؛ باز وشین نبشتانکے إنت۔ وشین گال، وشین بتل و گالبندان سرّریچین إے سیاھگ بلوچی أرزشان (values)ءِ سرا إنت۔
واجہ پھوال نبشتہ کتگ "۔۔۔ بلوچی فلسفہءِ ردا ھر بلوچا أبید چہ بلوچی کردا دگہ ھچ چیز شرفدار نہ کنت۔ پمشا بلوچ گش أنت 'جوھر بلوچء غیرت انت'۔"
دیمترا واجھا یک دگہ بلوچی بتلے داتگ کہ گشیت "شپ پہ إستار وش أنت و گیابان پہ بلوچ"۔ إے دوئین بتل پہ من نوک أنت۔ منا دوست بیت أنت۔ مانا إیش مان إنت۔ دومی بتلءِ مانا واجہ پھلوال سرکچ داتگ "۔۔۔گیابانءِ تھا نزور و کم اوپارین مردم زند گوازینت نہ کنت۔ بلے بلوچ گون گیابانا ھنچؤش لچّتگ کہ إستار گون آسمانءَ۔ ھمے اوپار کنگءِ بلوچی راھبندا بلوچ گون نہ وشین جاوران دیم پہ دیم بیگءِ ھاٹی داتگ أنت"۔
'بلوچ و بلوچی'ءِ تھا واجہ پھلوالءَ إے راستی وشین وڑےءَ بیان کتگ کہ آ دگہ پاکستانیانءِ چپ کہ نام إش چہ وتی سرڈگارا رستگ أنت؛ بلوچانءِ سرڈگارءِ نام گون بلوچان ھمگرنچ إنت۔ صدان ھزار سال پیسر وھدے بلوچ آتکگ أنت و إے خدائی سرڈگار إش وتی لوگ کتگ، گڈا سرڈگارءِ نام بلوچستان جؤڑ بیتگ۔ پمیشا بلوچ گش أنت:
کوھنگءِ إے کوھین تلار
کسّءِ پتءِ میراث نہ أنت
ما گون سگاران گپتگ أنت

إدا کوھنگءِ کوھین تلاران گون سگاران گرگءِ شعر-منی خیالا- راستیءِ قالبا شرّی سرا جاہ نہ کپیت۔ پرچا کہ وھدے تو گون سگاران چيزے گرئے بہ زان کہ تو إیشیا پہ زور چہ دگہ ٹک یا راجےءَ پچگرئے۔ بلوچان بلوچستان چہ کسا پچ نہ گپتگ۔ إے سرڈگار ھنچوش کہ نبشتانکا گشگ بیتگ تلپین خدائی زمینے بیتگ کہ بلوچان آباد کتگ، ألبت گون سگاران پھازتگ۔
صد خبرا یک خبرے کہ إے نبشتانک باز جوانین بنشتانکے إنت و بلوچانءِ شرّیان بیان کنگا إنت۔ أگر گالانءِ تکراری کمتر بہ بیتین أت، گڈا نبشتانک وتی مٹ وت بیتگ أت۔
دیمترا میر کمبرءِ ماتءِ بلوچی صفت بیان بیتگ أنت کہ آئی وتی بچّءِ کشگ بیگا 'ھلو ھالو' کنت۔ شعرءِ لھتے بند ھم دیگ بیتگ أنت۔ پدا 12 نقطوان بلوچی أرزش نز آرگ بیتگ أنت و گون إے گـُشتِنا نبشتانک سرجم کنگ بیتگ کہ 'بے تاوانا بلوچ سیت نہ کنت'۔

تاکا لیٹینگا واجہ أبو جلالءِ نبشتانکے 'ھستین سیاسی جاور و بلوچانءِ جھد' سرحالا شنگ إنت۔ إے نبشتانک گيئشتر نواب أکبر شھباز بگٹیءِ شھادتءِ چپ چاگردا پر ترّیت۔ ألبت مشرفءِ ھشت سالگین سرکارءِ باروا إشاروے کنگ بیتگ۔ إے إشارہءِ تھا اُستاد و شاگردءِ پگلءِ قصہءِ مثال دیگ بیتگ کہ شاگرد باریگ باریگا پگلءِ دست وپادان بُرّ أنت و وھدے پگل بے دست و پاد إبیت سُر إت نہ کنت۔ ألبت آ گشیت کہ إیشیءِ مانا إے نہ إنت کہ پگلءِ مارشت مُرتگ أنت، دردان مارگا نہ إنت۔ راستی إیش إنت کہ پہ وتی دردانءِ درشان کنگا پگلءِ وسیلہ پچگرگ بیتگ أنت۔ ھمے ڈولین حال آ ملکءِ مردمانےءَ گشگا إنت۔
پہ پنجابءَ چہ بلوچستانءِ نیمگا دیم داتگین فوجیانءِ لاشانءِ قصہ دیگ بیتگ۔ قلات جرگہءِ قصہ ھم آرگ بیتگ۔ مان راڈیو بلوچی إف إم –سویڈن نواب بگٹیءِ گپانءِ مثال دیگ بیتگ۔
بلوچستانءَ نوزدہ و نیم أرب روپیاءِ سرکاری لب و إے زر چے ڈول وتی گچینی مردمان بھر بیت کن أنت، چمشانکے دیگ بیتگ۔ بلوچانءِ وت مان وتی ناتپاکیا بلوچ و آوانءِ دشمن چے ڈولا گندگا بنت گون مثالان ظاھر کتگ۔ لائق ذکرین مثال میر ھزار خان بچارانی‏ءِ سروکیا لیویز فورسءِ إنت۔ پدا آئی بچ میر جمعہ مریءِ وبستائٹ 'بلوچ یونٹی'ءِ مثال آتکگ کہ بلوچ سرمچارانءِ پلانگریا زیریت۔
مان أمریکا جوڑ بیتگین ھوربند 'فرینڈز آف بلوچستان'ءِ ذکر ھم ھست إنت۔ إے پھکین جیڑہ گون لھتے راستیان ھنچوش دپ مان دپ داتگ أنت کہ چہ نواب بگٹیءِ شھیدیا رند بلوچستانءِ جاوران سرکچ ورگا بازین شوھازکاران کمک کت کنت۔

'جامءِ کتاب پیداک إنت'. إیشی شونکار راشد سیدءِ وتی نبشتانکے إنت۔ چہ مشرفءِ کتاب 'دی لائن آف فائر'ءَ بگر تا بانک نرگس بلوچءِ کتاب ' دی ڈیت آف إے لاین'ءِ ذکر آتکگ و ثابت کتگ کہ ھر کس کتابے نبشتہ کنگا إنت پمیشا جام محمد یوسف ھم پشت نہ کپگا إنت۔
آئی اُمید ظاھر کتگ کہ پہ ھمے اُمیدا کہ جام فوج و بلوچ سیاسی ٹولیانءِ توکی حالان سھیگ إنت، بازین راز تالان بنت؛ کتاب ئی مھمتر إنت۔ شرط إیش إنت کہ کتابءِ تھا خبر إیمانداری سرا شنگ بہ بنت۔

عمر عثمان بلوچءِ 'جبینءِ آس روک إنت' نبشتانک بازین سرپدی دنت۔ خاص ھما ندکار و ھنرمندانءِ باروا کہ آوان نواب أکبر شھباز بگٹیءِ شھادتا رند پاکستان سرکار تھروز کتگ و وتی پڑا کتگین کارانءِ بروردا رستگین سرکاری داد نہ زرتگ أنت و یا پدا سرکارءِ کٹـّا چگل داتگ أنت۔
چہ إے ندکاران یکـّے زاھدہ حنا إنت کہ گشتگ ئی "چشین وارین ملکےءِ دادا من ھدوک نیان کہ وتی باسکءِ پروشگا چست بیتگ"۔ پدا سعداللہ جان، بی بی نسیم زھرہءِ نام ھم دیگ بیتگ أنت کہ وتی داد إش نہ زرتگ أنت۔
بلوچ ندکاران واجہ صبا دشتیاریءِ نام، واجہ نادر قمبرانی، داکٹر ناگمان، ظفر علی ظفر، منظور بسملءِ نام دادان نہ زیروکین ندکارانءِ لڑا گون أنت۔ بلوچی گشندہ واجہ عارف بلوچ ھم وتی دادا سرکاری واکانءِ دیما جنوکین ھیروانءِ نیاما گون إنت۔
عارفءِ ناما گندگا رند منا یک کوھنین گپے یاد آتک۔ من أگر رد مبان 2003ءَ عارف، نورخان و دگہ لھتے گشندہ مڈل إیسٹءَ یک زیمری دیوانے کنگا إتنت۔ إیشی آنلائن شنگ بیگا أت۔ لندنءَ نندوکین من ھم گوشدارگا إتان۔ عارف و نورخان مردمانءِ جُستان پسّو دیگا إتنت۔ من چہ عارف جُست کت "شما پیسری بلوچ گشندوانءِ ڈولا پرچا راجی سوت نہ جن إنت۔ تا راجی مارشت ردوم بہ زیر أنت؟"
آئی پسّو دات "واجہ تو بلوچستانءَ نہ ئے، پمیشا راجی مارشتانءِ باروا فکر کنئے۔ إدا ھچ کس راجءِ فکرا نہ إنت"۔
آ سال دیریگین سالے نہ أت کہ مارشت إے ڈولا إتنت۔ نوکی دوسال گوستگ أت کہ عارف بلوچءَ بلوچانءِ سرا زوراکی مار إت أنت و چہ سرکارا رستگین دادءِ پدی دیگا أبید پہ وت دگہ درے نہ دیست۔
نبشتانکءِ توکا پشت کپتگین ندکارانءِ نام آتکگ و چہ آوان گلـّہ کنگ بیتگ کہ پرچا آوان وتی داد سرکارا پدی نہ داتگ أنت! نبشتہ کارا خیال ظاھر کتگ کہ دادان پدی سرکارا دیگءِ سببا شاید سرکارا گـَرَز مہ بیت، بلے میان اُستمانی چاروک گند أنت کہ إے سرکار مردمانءِ دلان چنچوک گِران إنت۔

تاکدیم 22ءَ منی دلپسندین رنگ رَز واجہ شکراللہءِ تران أنت۔ إدا سچکان گون واجہءَ گند نندے کتگ۔ شکراللہءَ علمی و گچینی جُستانءِ پسّو جوانیا داتگ أنت و وانوکان سرپدی داتگ کہ آئی چے ڈول چہ یک نوکباھندین رنگرزے شتگ و نامداریءِ قلاتا سر بیتگ۔ آئیءِ اُستاد نامدارین کوّاس شاہ نواز خان بوتگ۔ مان أمریکن آرٹس کونسلءَ آئی رنگرزیءَ کورسے ھم دربرتگ۔ گون وانوکان واجہ شکراللہ‏ءَ وتی بچاروکی چؤ کتگ "من بندرا پسنیءِ نندوکین مردمئیان۔ 1947ءَ سبزلءِ لوگا ودی بیتگان۔ 10 کلاس چہ ھمودا دربرتگ، پدا کراچیءَ آتکگان۔ چہ ھمدا بی إے پاس کتگ۔۔۔ چہ کسانیا رنگ رزی و نکش کشیءِ ھب بیتگ"۔
شکراللہءِ گشگ إنت کہ آئی بازین پاکستان پیشداشتان (نمائشان) بھر زرتگ اودا درامدان آئیءِ رزتگین ندارگ دوست بیتگ أنت۔ و بازین دانـَگ شرین نھادا بھا ھم بوتگ أنت۔ گرانبھاترین ندارگ 20،000 روپیاءَ بھا بوتگ۔
نامدارین مردمان آئیءِ رزتگین ندارگ زرتگ أنت۔ زیروکانءِ نیاما وزیر أعظم شوکت عزیرءِ جن ھم ھؤر إنت۔ أمریکائی ریسٹورانٹ چئین 'KFC'ءَ ھم گون آئی سئے سالءِ قرارے بستہ بیتگ۔ إیشیءِ ردا شکراللہءِ أڈ کتگین ندارگ مان جھانءِ أوارین کنڈان ھستين رسٹورانٹان جنگ بیتگ أنت۔ پہ درور مان ٹوکیو و مان مصرءَ KFCءِ یک یک رسٹورانٹےءَ آئیءِ رزتگین ندارگ لچتگ أنت۔
واجہ شکراللہءَ گشتگ کہ آئی وتی ندارگانءِ توکا گيئشتر بلوچی رنگ پیئش داریت۔ إے خبرا وانگا رند منی دلا خیال آتک کہ أگر آئی پاکستانی رنگ پیئش داشتین أنت، گڈا ألـّما مروچی آ شرّی سرا آپ لاپ أت۔ نین بارین چنچو بلوچ میر و مالداران آئیءِ ندارگ وتی دیوانجاھانءِ براہ کتگ أنت! إے جستءِ پسوا ھما بہ دے أنت۔ چہ واجہ شکراللہءِ خبران ھچ زانتکاری دستا نہ کپت، پرچا کہ گندگا آئی وتی مردمانءِ گلـّہ کنگا واھوک نہ إنت۔
10 تاکدیمانءِ إے گند نند لائق وانگا إنت۔ شاید پہ لھتے کسان واناک مہ بیت پرچاکہ باز إنکریزی گال کامرز بیتگ أنت۔
إے آر دادءِ دو تاکدیمی آزمانک 'جنگل کجا نیما کپیت' وش نبیستگ۔ لایق وانگ إنت۔ أگر إے آزمانکءِ نام 'آس دوستیءِ آماچ' بہ بیتین أت شرتر أت۔ پرچا کہ إیشی یک آس دوستےءِ قصّہ إنت۔
منا گیڑا أنت وھدے من نوکین بلوچی وانگ بندات کتگ أت، گڈا تاکبندانءِ تھا إے آر دادءِ شعران چم پرکپت أنت۔ یک دگہ نامدارین بلوچے آخر داد ھم ھست أت، پمیشا من ھر وھد إے آر دادءِ نام دیستگ أت گڈا آخردادءِ ترانگا کپتگ إتان۔

داکٹر ناگمانءِ نام پہ من نوکینے نہ إنت۔ منی خیالا ما یکـّین دئورا بلوچی نبیسگ بندات کتگ۔ آ دگہ گپے کہ من یک نزاتکارین و کاھلین مردمیان کہ درین ملکان کپتگان، روچ در روچ وتی بلوچیءَ شموشگایان، و داکٹر ناگمان بلوچی زبانءِ ترپوکین إستارے جؤڑ بوتگ و جند ئی یک کوّاسین وانندوے إنت۔
نین ناگمانءِ نبشتانک وانت۔ نزانان پرچا گشيگا من إے نبشتانک ساریا وانتگ۔ چؤ بیت ھم کنت، أگر دگہ جاھے شنگ بیتگ۔ سچکانءَ وا أولی بر إنت کہ من گندگایان۔
'ھست أت یک زبانے' سرحالءِ سرا إے نبشتانکا بلوچانءِ نادلگوشیءِ نیمگا چمشانک دیگ بیتگ۔ و چہ بلوچان دستبندی کتگ کہ وتی زبانءِ رکـینگا بہ تکش أنت۔ ھمے ڈولین یک نبشتانکے واجہ داکٹر بدل خان ھم 1990 دھرا نبشتہ کتگ أت۔ و ھمے ترس ظاھر کتگ أت کہ أگر بلوجان وتی زبانءِ نیمگا دلگوش گوَر نہ کت، گڈا آوانءِ زبانءِ نام یوکا تاریخءِ تاکدیمان پشت کپیت۔

حنیف شریفءِ آجوئیءِ روچ من ساریا وانتگ أت۔ باز جوانین و سادوین راھبندےءَ داکٹر حنیف شریف چہ وتی دستگیریا بہ گر تا پچین جیلا روگءِ حال داتگ۔ إے نبشتاکءِ سرحال پشتو زبانءِ گالبندے إنت۔ "باران وریگے" بہ زان ھؤر بیگا إنت۔ إے نبشتانکءِ ھر گال و جملہ لایق وانگ إنت، و یکین رندا وانگا سرجمین خبر دلا نکش بنت۔

دیمتری تاکان لھتے شعر أنت۔ من شاعری باروا باز گشت نہ کنان ألبت چہ ھمے شعران یکـّے محمد روابند نبشتہ کتگ کہ إیشیءِ أولی بند إنت:
کئورءِ کرّےءَ نشتگ و ھینّار إنت چیا
بزگین کیئپک چہ منا سیاہ مار إنت چیا
منی خیالا إے بندءِ دومی ردا گال "چہ" باید "پہ" بہ بیتین أت۔ ھمے شعرءِ گڈسرا نبشتہ إنت کہ إیشی نواب بگٹیءِ ناما نبشتہ کنگ بیتگ۔ ألبت منا ھچ چشین گپے دستا نہ کپت کہ نوابءِ کار و آئیءِ ستا مان بہ بیت۔ سبب ھمے بیت کنت کہ من شعران سرکچ وارت نہ کنان۔
اُستاد عبدالمجید گوادری و إسماعیل تابانءِ دراجکشین شعر ألـّما شرترین وڑےءَ شھید أعظم نواب أکبر بگٹیءِ شھادت و چہ آئی رند چست بیتگین جاوران پیش دارگا أنت۔
پشت کپتگین شعرانءِ تھا فرید فراقءِ لچّہ " بلوچستان"ءِ وانگءِ درگتا منا خیال آتک کہ ماسٹر گوادریءِ 'ما چکین بلوچانی' باید مٹـّینگ بہ بیت و ھمے وڑین شعرے آئیءِ بدلا زیرگ بہ بیت۔ پرچا کہ 'ما چکـّین بلوچانی'‏ءِ تھا ترندین و روایتی گالبند باز مان أنت۔
نوکین دئورا مردم نہ لوٹ أنت کہ آوانءِ ترسا زمین بہ لرزیت۔ نین مردم پہ وتی زمینءَ قربان بیگا واھوک أنت۔ آوان گون زمینءَ مِھر بیتگ۔ نے کہ نین قلاتانءِ جکسینگءِ دئور إنت۔

أداکار و کمنٹئٹر نذیر أحمد فدائیءِ بیرانی سرا یاسین مجروحءِ نبشتانک سادہ و واناک إنت۔ من حیران بیتان کہ إنچو بلوچی شعری بندانءِ بیگا پد ھم واجہ مجروح وتی مارشت اردو شعرانءِ بندان درشان کتگ أنت۔ نہ زانان بارین منی ڈولا آئی شعر سرپد نہ بیت یا اردو شعرانءِ دوستی ئی باز ھست!

حاکمیءِ کرسی واجہ سلیم ھمرازءَ وش رجانک کتگ۔ وشین قصوے إنت۔ منا دوست بوت۔ چہ إیشی پیسر منصورءِ داستان 'أنا ألحق' سرحالا شنگ بیتگ، من وانت۔ لھتے کسانین أدبی ردی ودی أنت۔ چؤ کہ دیم پہ پاھوا برگءِ گپ بیگا إنت، پدا سرا گڈگءِ خبر بیگا إنت۔ پاھوءِ مانا لوپ دیگ إنت۔ سرا گڈگ دگہ گپے۔ ألبت دوئین راھبند مرگءِ سزاءَ کارمرز إبنت۔

خلاصہ: سچکان بلوچی تاکبندانءِ تھا شرترین ماھتاک أگر گشگ بہ بیت، گڈا گون ماھتاک بلوچی إنصاف نہ بیت، ألبت إیشیءِ شونکار گندگا چہ شنگکاریءِ تک و پھنادان سرپدتر إنت و گون کموکین خیالداریا آ سچکانءَ شرترین تاکبند جؤڑ کت کنت۔ سچکان أگر وانگ مہ بیت، گڈا بہ زان إت کہ چہ بلوچستانءِ بازین جاوران سرپدی گون ضرورتان ھمرد نہ رسیت۔ پمیشا أگر بہ گشان کہ سچکانءَ وانگ ھژدری (ضروری) إنت، رد نہ بیان۔

بلوچ وبلوچی زندگ، و بلوچستان آباد بات۔

Rights reserved by www.balochinews.com