بارین شما زان اِت کہ بلوچ جوان چے ڈولا نیزگاری و فرقگزاری آماچنت؟

شھید مھرنھاد نبیست:
ڈرگءِ دیما دارگءِ میان استمانی روچا گون ھمرد۔۔
مروچي ڈرگءِ دیما دارگءِ میان استمانی روچ اِنت۔ ھما ڈرگ کہ بلوچ چہ ھر کسا گيئشتر آئیءِ آماچنت۔ ھر روچ ڈرگءِ ناما بلوچ قربان بیگا اَنت و وتی جانءِ بدلا آوان چیزے نہ رسگا اِنت۔ ڈرگ مان افغانستان و پاکستان کِشگ بیتنت و ایرانءِ راھا دگہ ملکان، چؤ کہ ترکی و چہ اودا دیمترا؛ پاچ لھتے مردمان کفرستانءَ رسینگ بیت۔ یے نیاما بلوچانءِ کرد چے اِنت؟
یے جستءِ پسّوا شرتر ھمش بیت کہ یک آماچےءِ پر دردین قصوا پہ شما بیاران۔ اصلا ھزاران بلوچ جوانانءِ زندگی نامہ ھم ھمے وڑا اِنت۔

الیکرانِکءِ ڈگریءِ واھندین سعید نامین بلوچے پہ کارے درگیجگا ادارہ برقا رؤت، بلے ابید چہ دگہ جست پدےءَ مذھبی مشکلان دیما یار نت و چہ اؤدا در ئی کننت۔ بزان کارئی نہ دینت۔ چہ اشی رند یے مرد حکومتی بنجاھان پہ ڈرائوری و دزبوگی کاران ھم دستبندی کنت، بلے ھچ کس آئیا قبول نہ کنت۔ رندا مجبور بیت کہ یکّے چہ وتی سیادانءِ گورا بہ رؤت. و چہ آئی دستبندی کنت کہ روچا کارمرز بیوکین وتی پیکان گاڑیءَ به دات تا شپان آئیءِ سرا مسافر کشّی بہ کنت۔ سیاد آئيءِ ضرورتءِ پدا منّیت و تا لھتے ماھان سعید ھمے کارا کنت۔ البت رندترا واھند گاڑیءَ بھا کنت۔ یے ڈولا آ پدا بے روزگار بیت۔

مدتے رند لھتے مردم سعیدءِ گورا رونت و سوج ئی دینت کہ افغانستانءَ به روت و آودا دڑگ بھا کنوکان بہ گشیت کہ چہ زاھدانءِ راھا وتی ڈرگانءِ گوازینگا آئیا کارا بہ دارنت۔ البت سعید و آئیءِ کھول نہ منّنت۔ رندترا یک دگہ مردمے چہ بم سوچگی تیلءِ آرگا آئیا وتی ڈرائور داریت۔ لھتے بران روگا رند یک روچے پولیس ڈیک وارت و آ گاڑیءَ تاچیننت، بلے دیمترا گاڑی پچ لیٹیت۔ اشیءِ سببا گاڑیءِ واھند بیران بیت و سعید وت سک ٹپّيگ بیت۔ دگہ سوچگی تیل بروک آوانءِ کمکّا وتا رسیننت و ھمش کہ سعیدءَ چہ گاڑیءِ در کننت، گاڑی بن گریت۔ (شما وت گاڑیءِ مرتگین واھندءِ کھولءِ حالتءِ اندازوا بہ جن إت کہ چہ یے حالءِ رسگا رند چون بیت!)

سعید نادراھجاھا رسینگ بیت و اودا تا بیست روچ واپینگ بیگا رند آئی درکنگا مالی مشکل ودی بیت۔ چہ ٹلوژن و کالیءَ بہ گر وتی لوگءِ سرجمین کالایان بُھا کننت، و ھفتاد ھزار چہ یکّےءَ وام کن زیرنت، و آئیا در کننت۔ ھمے درگتا سعیدءِ کسانین برات کہ مدرسوا وانگا بیتگ وتی وانگا یلہ کنت و میرجاوہ سیمسرا 'بدوکی' کنت تا روچے دوھزار تمن درگپت بہ کنت و پہ وتی کھولا خشکین نانے زرت بہ کنت۔

ھفتگے رند وام دیوک پہ وتی وامانءِ گرگا سعیدءِ گورا رونت۔ اشیءِ سببا سعید سک پریشان بیت و پہ وتکشی کنگا ساڑی بیت۔ البت کھولءِ مردم سھیگ بنت و آئیءِ دیما دست بندنت و مھن ئی کننت۔ سعید پہ وت دگہ درے نہ گندیت و مجبور بیت کہ افغانستانءَ بہ رؤت۔ اودا یک افغانے گؤن آئی ڈیک وارت و آئیا پہ چکّاسگا وتی ڈرائور و پانک (گاٹ) کارا داریت۔ یک ھفتگے مفتا چلوپگ کنگا رند ارباب سعیدءَ گشیت کہ ساڑی بہ بیت۔ پدا یے ھم جست ئی کنت کہ تا کجا آ ھمراہ بیت کنت؛ تا ترکیءِ سیمسرا؛ ارومیہ؛ کرمان؛ کجا!
سعید کہ ایوکا پہ وتی لاپءِ درگيجگا آتکگ اَت، نزیکترین جاہ، کرمانءَ زیریت۔ پہ یے منزلا سیصد ھزار تمن پگار ارباب پہ آئی بندیت۔ دیم پہ کرمان روگءِ وھدا سعید یکّے چہ وتی ھمراھانءِ دیما گشیت کہ آئیءِ واھگنت 'یوکا سے رند بہ روت و چھر بہ کنت؛ بس وتی وامان دیگ لؤٹیت'۔
خیر، وتی مالان کرمان رسینگا رند دو گاڑیان سوار ھفت کس چھر کننت و دیم پہ افغانستان راھی بنت کہ آوانءِ گاڑی چیئر گپتگین بمبے لگت کنت، سعید و دو کس دگہ کشگ بنت۔ چہ آئیءِ جسدا یوکا 4 موردانگ پشت کپیت۔

آدگہ گاڑی یوک بیت، البت آپ و توشگ گون تباھین گاڑیءَ رونت۔ دیمترا یے گاڑی ریکان مانگیشیت و مردم پند رھیج گرنت، بلے زیت وتی راھا گار کننت و سر سر جنگا لگنت۔ ھر یکّے یک نیمگے رؤت۔ رندترا چہ اشان یکّے پولیسءِ دستا کپیت و وتی قصوا آوانءِ دیما بیان کنت۔ پولیس ھلی کاپٹرءِ سرا آدگہ سئین کسان ھم درگیجیت۔ پولیس گندیت کہ اشان چہ ریکانءِ گرمیءَ وتی پچ درتگ و پادان پتایتگنت۔ تنّا ھلاھوش، گرمیءَ پیلوشتگنت و ھر یکّےءِ جون یک گورے کپتگ، بلے روحان بال کتگ۔

یے ڈولا چہ ھفتین کسان یکّے پشت کپیت۔ لھتے روچانءِ دوادرمانا رند پولیس آئیا بندیگجاھا رسینیت۔ چہ درنجگ بیگا پیسر آئی وتی قصوا آدگہ بندیگانءِ دیما گشیت۔ و مردمانءِ جستانءِ پسوا آئی گیئش کنت:
مئے جاور سک نگیگنت۔ چؤ کہ سعید؛ مردم دنیاءِ توکا پہ وت ھچ راہ نہ گندیت و وتکشیءَ رسیت۔ وتی ھمے حالتءِ ایرموش کنگا یے راہ ما گچین کتگ؛ پہ ھمے امیدا کہ اگر یک رندے سلامتیءَ چھر بہ کنین گڈا مئے مشکلانءِ سادءِ یک گرنچے پچ بیت۔ آدگہ سرجمین راہ ھما وتکشیءِ راهنت، بس نامش دگر بیت کننت۔

یے قصہ مان افغانستان آوانءِ اربابءِ چارمی جنءِ گرگءِ حالءِ شنگ بیگا و ایرانی روچتاکان ڈرگ بھا کنوکانءِ یک مزنین ٹولییےءَ پولیسءِ شوھازیگ بیگءِ خبران سرجم بیت۔ ھچ کسا نیزگاری و فرقگزاریءِ سرا چیزے نبشتہ نہ کت۔
دوشنبه 5 تیر1385ھمدپ گون 26 جون 2006 صحبء کلاک: 8:43